كيف بدأ الفن؟
كيف بدأ الفن؟
ايه الي يخلينا كبشر كائنات كانت عايشة في غابات السافانا و بتحارب وحوش و بتوفر أكلها يوم بيومه تهتم بالفن؟
الفن هو: تجلى للجمال؛ الصفة اللي احنا بنطلقها علي كل ما يؤثر فينا بعمق و يجعلنا نقف صامتين مذهولين لبعض الوقت متناسين أمام وجوده وجودنا الشخصي و مشاكلنا.
علي مر العصور طلع تفسيرات عن ليه و ازاي احنا بندرك الجمال.التفسير الأقدم بالطبع هو أن الجمال في عين الرائي. علماء الاجتماع بيقولو: إن الجمال هو ما كيَّفنا و بَرمجنا المجتمع علي رؤيته جميل. و كلا التعريفين يرى أن الجمال مالوش وجود و إنما معتمد على المُستَقْبِل، فلو كان ده حقيقي فليه الفنون عابرة للقارات والثقافات؟ ليه الأمريكي يشوف تماثيل الفراعنه آية في الجمال؟ و ليه الياباني يسمع بتهوفن؟ و ليه الانجليزي يحتفظ بآثار لحضارة الانكا؟
إذن يبدو أن هناك شئ ما حقيقي اسمه الجمال عقولنا تعودت أن تراه و تميزه و اتبرمحت علي التأثر بيه.
كيف بدأ الجمال و الفن؟
العلماء رجعوا في السجلات التاريخية و الأحفورية عشان يشوفوا امتي البشر ابتدو ينتجو فن فقط لغرض جمالي. ايه اول عمل فني؟ هل هي معابد وآثار الحضارات القديمه الي بقالها ٦ل٧ آلاف سنة؟ أو رسومات الكهوف للإنسان من ٤٠ الف سنه؟
اول عمل فني اتعمل من ٢ مليون سنه، حيث أجدادنا الهوموإيركتس أنتجو مئات من الحجارة المنحوتة لتصبح أدوات صيد. ما يميزهذه الأدوات أنها مصنوعه و مصقولة بإتقان شديد على شكل ورقة شجر متماثله وعلى الوجهين محاكية شكل الماسة! مش بس كده، كمان دي احيانا مدهونة، أو من مواد صعب الحصول عليها في ذلك الوقت، كمان أدوات الصيد دي غير مستخدمه و أحيانا بأحجام لا يمكن حملها و استعمالها في الصيد أساسا!
هنا السؤال ايه الى يخلي كائن بشري بدائي يصنع سلاح مصقول و جميل و غير قابل للاستخدام؟
الإجابة الي توصلها علماء الحفريات و الانثروبولوجي هي أن هذا السلاح هو أول عمل فني في التاريخ، اتصنع بس عشان يبقي متقن و جميل.
السؤال هنا ايه فايدته؟ ليه تضيع وقت الصيد و الصراع على البقاء انك تقعد تعمل منحوته جميله زي دي؟
الإجابة هتيجي لما تعرف ايه هي القوى الي بتحدد البقاء و الاستمرارية ليك و لنسلك و لجيناتك؟
عندنا قوتين ؛ الانتخاب الطبيعي بيحدد البقاء للانسب و الأجدربالبقاء في بيئة معينة؛ و الانتخاب الجنسى حيث اناث النوع بتختار الصفات إلى هي شايفاها أفضل للتناسل: زي ما انثي الطاووس اختارت الذكور الي ليها ذيول زاهية مثلا.
ما الذي يعنيه قدرة البشري البدائي علي النحت لبقاء جيناته ؟ مهني هذا ان البشري البدائي، اللي بيعرف ينحت وينتج قطعة فنية، عنده مهارات تفكير عليا، عنده قدرة على التخطيط، و عنده إدراك للسيمتريه (التماثل)، عنده قدرة على متابعة تنفيذ خطة للوصول لهدفه النهائي، وكمان عنده قدرة عالية على التحكم بيديه ويستطيع تنفيذ حركات دقيقة مُحكمة. كل دي صفات يقدر الذكر انه يعرضها على الانثي بمجرد ما ياخذها الكهف عشان يوريها سلاحه؛ و ده بيزود فرص إنه يلاقي شريكة و ينجح في تمرير جيناته اللي هيكون فيها جينات نفس القدرات السابقة دي فتكمل هذه الصفات و تنجو و تنتشر أكثر! مع الوقت الإناث ابتدت تختار الذكور الي عندها ميول و قدرات فنية؛ لأنها اذكي و دماغها بيشتغل بطريقة أفضل و دي طريقة هتوفر الأمان ليها و لذريتها و هيضمن ليها البقاء.
امتى بقي استطعنا انتاج الفن ده؟
قبل ما نعرف اللغه و الكلام ب ١٠٠ الف سنه.. يعني حضرتك اسلافك بيتواصلو و بيشقطو بالفن من قبل ما يعرفو الكلام!
فلما تقف قدام ماسة جميلة؛ افتكر إن ده أقدم شكل فني اسلافك اكتشفو انه جميل و كانو بيقدموه للستات من أجل التزاوج ولازال التقليد مستمر للنهارده!
تعليقات
إرسال تعليق