كيف أصبحت مصر هبة النيل؟
اهمية مصر في العالم القديم، و سبقها علي باقي مناطق العالم،كان جاي من ميزتين اساسيين و مهمين جدا و هما وجود نهر النيل، و البشر الي نجحوا في استغلال الظروف جيدا.
كيف جمع النيل البشر؟
الي حصل ان مين حوالي ٧٠٠ الف سنة اجداد البشر من الهومو اريكتاس جاءوا و بدأوا يستقروا حوالين النيل؛ و ان كانو لا زالوا جامعي ثمار و صيادين. بس منطقي حوالين مصدر مياه، و في وجود شكل مختلف للكوكب ككل، في الوقت ده مصر كان فيها غابات و حيوانات يعني حاجات كده زي محميات افريقيا الي انت بتتفرج عليها فيها زرافات و اسود و مساحات واسعة من الاشجار و الثمار. في الوقت ده ما كنش عند اجدادنا دول اداة غير أداة واحدة و هي الفأس اليدوي، و هو حتة من الحجارة منحوتة و مدببة و قد كف الايد، بتستخدم لاصطياد الحيوانات الصغيرة او لتكسير العظام و اكل نخاعها مما يتبقى من الفرائس بعد ما الحيوانات المفترسة تخلص اكلها! و بيطلق علي الفترة دي العصر الحجري القديم المبكر.
و لمدة اكثر من ٦٠٠ الف سنة كان الوضع علي كده، أداة حجرية واحدة و نمط معيشة يتمحور حول الصيد و جمع الثمار.
و من ٧٠ الف الي ٤٠ الف سنة تقريبا ده كان عصر الهومو نايندرثال، و دول مش من اجداد البشر و لكن يمكن اعتبارهم اخوة، متطورين من نفس الجد، و في الفترة دي بدأوا يطوروا تقنية التشظية أو التقشير، حاجة شبيهة بعملية "بري القلم الرصاص كده". و باستخدام التقنية دي بدأ يظهر أدوات جديدة زي الخناجر و المقاشط لتشفية اللحوم و الجلود بشكل جيد.من حوالي ٤٠ الف سنة الي ٣٠ الف سنة ابتدى يظهر الهوموسيبيان في مصر القديمة و بظهورهم انتهي العصر ده و هو الحجري القديم المتوسط و بدانا في العصر الحجري القديم المتاخر.
في العصر ده ابتدى النيل يتراجع و تظهر مستنقعات، و هنا ابتدئ يظهر افران من الطين الني، و حجارة لطحن الحبوب و ظهر المنجل و القوس كاول سلاح يخزن الطاقة و كان اختراع عمل ثورة في عالم الصيد لانه اعطى للبشر الفرصة لانه يصطاد فرائس اكثر و من بعيد في أمان نسبي بدلا من الاقتراب من الحيوانات لاصطيادها. وابتدى يظهر بدايات للاستقرار. في الوقت ده متوسط الاعمار كان ٣٠ سنة!
الفترة دي كلها تسمي العصر الحجري القديم من ٧٠٠ الف سنة و حتي ١٠ الاف سنة. و هي دي فترة جمع الثمار و الصيد ما قبل الحضارة. وزي ما انت شايف غالبيتها ما كانش فيه اي أداة لمدة ٦٠٠ الف سنة غير حتة حجارة، قارن سرعة التغير في الادوات و التكنولوجيا ما بين العصور دي و عصرنا الحالي!
تدخل بعد كده علي العصر الحجري الوسيط و ده ما بين ١٠ الاف ل ٥ الاف سنة.ابتدئ هنا يظهر الطبخ و يظهر استخدام الصبغات للتجميل، طبعا موضوع الكحل ده كان اختراع غرضه الاساسي امتصاص اشعة الشمس ، في بيئة صحراوية بتأثر فيها الحرارة و الرطوبة علي الرؤية. ثم بعد ذلك بدأ استخدام الالوان في الزينة.
العصر الحجري الحديث ما بين ٥٠٠٠ ل ٣٢٠٠ سنة قبل الميلاد: و هنا ابتدت الزراعة و طبخ الحبوب و بدايات الخبيز و كمان تخمير البيرة. في أي قرية قديمة بمجرد ما المستكشفين بيلاقوا المخبز بيدور جنبه علي خمارة البيرة، و العكس بالعكس دول كانوا عواميد الغذاء في الوقت ده . حاجه مفصلية كمان حصلت في الفترة دي و هي بداية صناعة الفخار. و هنا الصناعة دي بتتطور من مجرد صنع اواني للمياه و غيره الي أعمال زخرفة و محاولات لتشكيل الفخار بشكل فني، و هنا علماء المصريات بيقولوا دي بدايات ظهور مجتمع مهتم بأكثر من مجرد البقاء و بقي عنده حس فني!
مصر في الوقت ده مجرد قرى منعزلة غير متصلة متناثرة علي مجري نهر النيل ، القرية مكونة من ١٠٠ل ١٥٠ فرد. و هم دول النواة الي حواليها قامت الحضارة المصرية. حوالي ٣٢٠٠ قبل الميلاد، ثم هيظهر اول حضارة مركزية في التاريخ و هنتكلم عن مصر كهبة المصريين و دور البشر في خلق اول و اهم حضارة في التاريخ.
#مصر_القديمة
تعليقات
إرسال تعليق