الثمانية… الأسطورة المؤسسة لمصر القديمة!
في البوست اللي فات اتكلمنا عن دور النيل في جذب البشر و تجمعهم في مصر ما قبل التاريخ https://bit.ly/3QTmq4t. هنتكلم عن البشر كتاني اهم عامل في بداية الحضارة في مصر بعد نهر النيل. و المدخل الاهم لمعرفة المجتمع البشري هو معرفة الاسطورة الي مبني عليها هذا المجتمع. و الاساطير تاخد بالك و انت بتقراها انك لازم تنتبه للتفاصيل و ما تاخدهاش حرفيا و تحاول تستوعب الهدف من القصة.
الاسطورة بتبدأ بثمانية آلهة بدائيين، أربع أزواج ذكر و انثي؛ هتلاحظ ان الانثي اسمها بينتهي ب (…يت)، و هي دلالة التأنيث في اللغة القديمة.
١- هوك و هوكيت: و دول آلهة انعدام الشكل؛
٢- كوك و كوكيت: و دول آلهة الظلام؛
٣- آمون و آمونيت: و دول آلهة الاختفاء؛
٤- نون و نونيت؛ و دول آلهة المياة البدائية أو القديمة.
الثمانية دول بيدولك لمحة عن كيف يري المصريين العالم القديم قبل الحضارة؛ عالم فوضوي؛ بلا شكل، مظلم، لا شئ فيه ظاهر، و لا يوجد شئ مادي غير الماء. و هتلاقي صدى لده في كل الاساطير و الاديان، دائما البداية فيها ظلام و مياه!
ثم تخرج التبة البدائية من المياه القديمة و يظهر عليها الإله: آتوم؛ و هو الاله الاول الذي خلق كل شئ و خلق نفسه! و تصبح الالهة القديمة : تسعة.
آتوم ينجب ابنائه اللي هم مكونات العالم بالنسبة للمصريين:
١- شو ( الهواء) و تيفنوت ( الرطوبة)؛ و و بيتجوزا و يخلفوا؛
٢-چيب ( الارض)، و نوت (السماء)،
وزي ما انت شايف هنا المصريين بيبينوا لنا ما يعتقدون انه اساس الحياة على الارض؛ الهواء و الرطوبة و السماء و الارض.
چيب و نوت: بيجيبوا اربع ابناء، زوجان ولد و بنت؛ و الواد و البنت دول بيتجوز! فهم إخوة و زوج و زوجة في نفس الوقت!
١- اوزوريس، و ايزيس
٢- سيث، نيفتيث.
كلهم بيميلوا للخير الا سيث بيميل للشر.
حكم ازيس و اوزوريس مصر و تولوا مهمة تحضير مصر؛ الحضارة تعني تعليم البشر تربية الماشية و الزراعة. و بعد ان تحضرت مصر انطلق اوزوريس ليعلم باقي العالم الحضارة و ترك ايزيس علي عرش مصر.
ايزيس كانت ساحرة؛ و كان يطلق عليها: التي تعرف كل الاسماء. لانه في اعتقاد المصريين القدماء عشان السحر يأثر عليك لازم يكون معمول باسمك الحقيقي. و عشان كده كانت عادتهم يسموا الطفل اول ما يتولد اسمين: اسم حقيقي ما يعرفوش غير امه، و اسم ينادي بيه و سط الناس. عشان لو حد حب يعمله عمل يعمله باسم الشهرة بتاعه فما يصيبوش السحر. و الوحيدة الي عارفة كل الاسماء و قادرة على كل السحر هي ايزيس.
و ده مهم لان قدرة ايزيس دي هي الي منعت نجاح خطط سيث في تدمير و عمل اسحار تدمر مصر بعد مغادرة اخوه اوزوريس.
و لكن سيث كان ماكرا! و عمل خطة بعد رجوع اوزريس للقضاء عليه. سيث عمل صندوق بمقاسات جسم اوزريس (تابوت خشبي). و عمل حفلة و مأدبة كبيرة و دعى الكل لحضورها بما فيها اوزوريس. و بعدين عمل مسابقة و قال ان الي التابوت يجي علي قده يبقي هو الي كسب؛ حاجه كده زي حذاء سيندريلا!
و بالفعل كل اللي في الحفلة يحاولوا يدخلوا التابوت، و يفشلوا، لغاية لما اوزوريس يدخل التابوت؛ و يقوم سيث بسرعة قافل التابوت عليه بمسامير و صابب عليه رصاص سائل عشان يمنعه من الخروج! و بيرمي التابوت في النيل.
النيل بياخد التابوت و بيوصل للبحر المتوسط، الي امواجه بترمي التابوت علي شواطئ بابيلوس؛ لبنان القديمة. و هناك التابوت بيصطدم بشجرة كبيرة، و جذع الشجرة بينمو حوالين التابوت و يصبح جزء من جذع الشجرة. و تمر الايام، و ملك بابيلوس يحب يبني قصر ضخم، فيقطعوا جذع الشجرة ده، و يستخدموه كاحد أعمدة بهو القصر الجديد، لينتهي بتابوت اوزريس المطاف كجزء من ذلك القصر!
ايزيس بتفضل تبحث عن زوجها، لغاية لما توصل لبابيلوس، و بتروح للملكة و تقنعها بمأساتها، و بتاخد جذع الشجرة و تطلع التابوت و تعيده الي مصر ليدفن بطريقة لائقة.
سيث لا ينتهي من ألاعيبه، و يقرر انه يسرق الجثة و المرة دي بيقطعها ل ١٣ جزء و بيلقي بيهم في اماكن مختلفة من النيل. عشان يقضي علي اي امل في عودة أوزوريس مرة أخرى.
لكن ايزيس بتتحول لطائر و تحوم حول النيل، و بمساعدة اختها نيفتيث، زوجة سيت؛ بتكتشف كل أجزاء جسد زوجها فيما عدا: القضيب. فالقضيب بلعته إحدى الاسماك.
ايزيس يتجمع جسد زوجها مرة أخرى، و تخلق له قضيب سحري، و تعيده للحياة مرة أخرى؛ ليصبح أوزوريس أول من يقوم من الموت في التاريخ و يصحب اله الموتى و العالم الآخر! ثم يمارس ايزيس و اوزريس الجنس و تلد ايزيس الاله حورس؛ اله الاحياء!
حورس بيدخل في معارك مع عمه سيث علي حكم مصر؛ و محاورات و صراعات بعضها +١٨؛ ممكن نبقي نتكلم عنها في وقت لاحق. ثم ينتصر حورس على سيث و يفقد احدي عينيه في المعركة، لكنه ينتصر و يصبح هو حاكم مصر. سيث لا يُقتل و لا يموت: فالشر و ربما الشخصية الشيطانية و صراعها مع الخير دائم حتى النهاية.
وزي ما قولنا الاساطير هي قصص يجب أن تنتبه لتفاصيلها و لا تأخذها حرفيا؛ و تستخرج منها العظات و العبر الي الالهة عاوزاك تعرفها.
الاسطورة دي اسست لاشياء كثير:
اولا: زواج الاخوة في العائلات الملكية المصرية فزي ما ايزيس و اوزوريس اخوات و ازواج ملوك و ملكات مصر ممكن يكون اخوات و ازواج للحفاظ علي نقاء الدم الملكي.
ثانيا: بتحدد شخصية المصريين الي بيؤمنوا بالقيامة بعد الموت؛ زي عودة اوزوريس كده، لكن بشرطين إنك تدفن في مصر و ان جسمك يكون كامل.
فعشان كده المصريين لم يكونوا غزاه و محتلين و لم يهاجروا خارج حدود مصر لان ده معناه ان اللي هيكون بره مصر هيفقد فرصته في الحياة الاخري!
و كمان لازم جسمه كامل فكان الكهنة المسئولين عن التحنيط بيعملوا اطراف خشبية للجثث حتي تتمكن من البعث مرة أخرى، و التابوت الي دفن فيه اوزوريس هو بداية توابيت الفراعنة الي بتاخد شكلهم زي تابوت توت عنج امون كمثال.
ثالثا: الذي يموت سيذهب الي اوزريس و يعيش معه و تحت حكمه، بينما الاحياء يحكمهم حورس. و عشان كده كل ملوك مصر عند تنصيبهم بيتحولوا للاله حورس؛ مش بيمثلوه لا حورس بيحل فيهم، و لما بيموتوا بيتحولوا لاوزوريس، و يتحول الملك الجديد لحورس و هكذا، فمصر دائما يحكمها حورس.
رابعا: مصر هي الاصل هي بداية العالم من وجهة نظر المصريين، فالالهة التي خلقت العالم مصرية، و هي اللي علمت العالم الحضارة!
تقدر تشوف كده ملامح حضارة البشر اللي هيبنوا مصر، الملك إله، مؤمنين بالبعث بعد الموت، مؤمنين بالنظام في مقابل الفوضي و ده مفهوم "معت" او الاستقرار علي النظام الالهي للكون، طول ما فيه ملك، اله، حورس، علي العرش فده عصر تسوده معت و اذا ده محصلش زي في فترات الانحدار فدي فترات بلا معت و خروج علي النظام الالهي للكون.
المرة الجاية نتكلم عن بداية مصر في التاريخ و ايه الي خلي مصر بالذات تبقي مميزة كده عن باقي العالم القديم.
#مصر_القديمة
تعليقات
إرسال تعليق