هلوسات الفراعنة، الالياذة والاوديسا، والوعي البشري!
هلوسات الفراعنة، الالياذة والاوديسا، والوعي البشري!
تفتكر الناس من 3 الاف سنة كانت بتفكر ازاي؟ هل كانت بتفكر زينا ولا كان التفكير مختلف عننا دلوقتي؟
السؤال ده أثاره عالم المخ والاعصاب جوليان چينز سنة 1976 في كتابه (أصول الوعي البشري وانهيار العقل الثنائي). ومن ساعتها والجدل والبحث في نظريته لم ينته، لأن جوليان ببساطة بيقول ان الوعي البشري لم ينشأ ويكتمل إلا في آخر ألف إلي ألف وخمسمائة سنة. يعني قبل كده كانو كائنات بتأكل وتشرب وتبني وتتكلم ولكن بدون وعي ذاتي او معرفة بالذات!
فكرة غريبة صح؟ يعني ايه هل الفراعنة وهم بيبنوا الاهرامات كانو مش واعيين؟البابليين والاشوريين وهم بيبنو الحضارة بتاعتهم مكنش عندهم وعي خاص بيهم ؟اومال كانو بيفكرو ازاي؟!
هنا بيلجأ چوليان لتحليل اقدم النصوص اللي لينا اتصال ثقافي متصل معاها وهي الالياذه والاوديسا جوهرة الادب اليوناني القديم. وبتحليل الالياذة بيقول: ان كل شخصيات الملحمة بتُظهر أعراض شيزوفرينا كاملة و طول الوقت بيسمعوا أصوات الآلهة، و بناء علي توجيهاتها، بيقرروا هيعملوا ايه في حياتهم!
مش بس كده، مافيش أي كلمة في الالياذة بتثبت ان كان فيه وعي خاص للشخصيات في الملحمة. كلمات زي: الشعور بالذنب، العقل، التفكير، التذكر، التردد وغيرها من الكلمات اللي بتعبر عن وجود حوار ذاتي داخلي لدي الابطال مش موجودة!
وده زي ماجوليان بيقول لان ده كان الطبيعي زمان، ففي العصور القديمة كان البشر كائنات عاقلة ولكن بلاوعي. وزي ما أنت تقدر تسوق العربية مسافة طويلة جدا وانت سرحان، فهم كانوا بيعيشوا ويموتوا كده غير مدركين لذاتهم! بالاضافة لده كمان فطول الوقت كانو بيهلوسوا الآلهة بتاعتهم وبيسمعوا أصواتهم الداخلية وتترجمها عقولهم علي انها صوت الاله او صوت القائد او الاب او المرشد الروحي. و كلما واجهه اختيار يأتيه توجيه الآلهة او المرشد الروحي او روح الاباء و هكذا!
و بيفسر جوليان الظاهرة دي بأن مخهم كان ثنائي التركيب او ثنائي الحجرات Bicameral Mind : حيث النصف الايمن المسئول عن الهلوسة و المشاعر يعطي الأوامر للنصف الأيسر القائم بالأعمال الفعلية، والنصف الأيسر بيستقبل تلك الاشارات علي أنها أوامر الإله!
وعشان كده الالهة كانت كتيرة وقريبة وساكنين علي الارض. وكان دايما فيه مرادف لمصطلح التوجيه الإلهي الداخلي في اللغات القديمة.
ومع الوقت، ابتدت الهجرات تحدث بشكل أكبر والمجتمعات تكبر، وبالتالي التشكيلات المجتمعية تتغير واللغة تتطور والكتابة تنتشر. (اللغة عامل حاسم في ظهورالوعي، زي ماجوليان بيقول في نظريته، لأن استخدام المجاز والضمائر يحتاج لوعي بالذات لفهمه والتعامل معه).
وهنا بيصبح نظام المخ ثنائي التركيب مايساعدش في الحياة الجديدة هنا ابتدي الوعي بالذات يظهر. و ابتدي من حوالي ألف سنه قبل الميلاد مع ظهور الفلاسفة وبداية التفكيرالبشري الذاتي الغير موجه بصوت الآلهة. وبتبتدي الآلهة تبعد وتبقي في السما مش في الارض، وتبتدي تبقي غير شخصية، وهتلاقي بقايا لطريقة التفكير دي في العهد القديم والعهد الجديد وهم الكتابين القديمين الاخرين اللي اعتمد عليهم البحث. حيث مرادفات الاستبطان والشعور بالذات غير موجودة في العهد القديم وتبدا بالظهور تدريجيا في العهد الجديد.
والوعي البشري بيبدا يظهر لاول مرة و بيوصل لاقصاه خمسماية سنة بعد ولادة المسيح. يعني عمر الوعي البشري زي ماحنا عارفينه عمره تلات الاف سنة بالكتير جدا. قبل كده البشر كانو عايشين في هلوساتهم الخاصة مع آلهتهم القريبة اللي بتوجه خطاهم واللي هي صوت عقلهم!
لو شوفت ويست وورلد، في الحلقة الاخيرة من الموسم الاول اسمها bicameral mind، وفيها بتكتشف دولوريس ان الصوت اللي بيوجهها مش هو صوت ارنولد (الخالق او الاله)وانما صوتها الداخلي. هي دي طريقة تفكير الناس في العصور الأقدم، واخدوا آلاف السنين عشان يلاقو صوتهم الداخلي.
فيه اصول لموضوع المخ الثنائي دي في المجتمعات الأمية وفي الاوقات القديمة. فكر كده كام مرة سمعت من قريبك الكبير في السن عن تدخلات لقوي ماوراء طبيعية في حياتهم. اللي كلم ربنا واللي كلم ملاك واللي كلم جن او عفريت او مارد. حوادث تكاد تنعدم النهارده و لو اتقالت بيتهم اللي بيحكيها بالجنون!
ارجع شوف ويست وورلد تاني و ركز مع الحوار فيه، و فكر هل الفراعنة كانوا وهم بيبنوا الاهرام معتقدين انهم بيتحدثوا مع الآلهة فعلا، و لا جوليان كان بيهلوس علينا؟!
تعليقات
إرسال تعليق